الحلقة 6
دوره تأهيل المقبلين على الزواج و المتزوجين
بسم الله الرحمن الرحيم
اتجوز صح
معاكم احمد وجيه مؤسس مدرسه اتجوز صح اول مدرسه تطوعيه لتاهيل الشباب للزواج ومحو الاميه الزوجيه
اتكلمنا الحلقه الى فاتت عن نصائح للمقبلين على الزواج
وانهاردا هنتكلم عن الفرق بين الرجل والمراه (ادم & حواء )
خلق الله ادم ، وخلق حواء بعدما استوحش آدم الحياه لوحده في الجنه
و ربنا خلق حواء من ضلع آدم وسبحان الله يخلق من آدم حواء اللي هتكون مختلفه عنه في حاجات كتير
علميا : المرأة تستطيع أن تتحمل الألم أكثر بكتير من الرجل
ودى حكمه ورحمه ربنا بيهم علشان تقدر أنها تتحمل ألم الحيض وألم الولادة وألم النفاس
وربنا خلق ادم من تراب لانه سيتعامل مع الارض فيزرع ويشقى وخلق حواء من ضلع اعوج يحمى القلب وتكون مهمتها في الحياة أنها تتعامل مع العاطفة ، لانها هتكون أماً حنونة ، زوجة محبة ، وأختاً صابرة ، وابنة عطوفة
علشان كده ربنا عمل الفروق دى بينا وميز كل حد بصفات علشان نكمل بعض
احنا متفقين ان مفيش حد افضال من حد وان ربنا وهب لكل حد مزايا حسب طبيعته قدراته الجسمانيه والنفسيه وحسب مهمته فى الحياه
من واحنا صغيرين اتربينا على اغنيه البنت زي الولد ماهيش كمالة عدد لسعاد حسنى
هى زى الولد فعلا بس فى الحقوق والواجبات
انما في الطبيعه البيلوجيه والنفسيه والجسديه والجنسيه مختلفين بعض الشيء
اختلاف جميل
اختلاف يكمل بعضه
بسم الله الرحمن الرحيم :
( فَلَمَّا وَضَعَتْهَا قَالَتْ رَبِّ إِنِّي وَضَعْتُهَا أُنثَى وَاللّهُ أَعْلَمُ بِمَا وَضَعَتْ وَلَيْسَ الذَّكَرُ كَالأُنثَى ) آل عمران الآية 36 .
ليس الذكر كالأنثى هنا مش تفضيل
لكن اقرار ان فيه اختلاف بين الذكر وبين الانثى
طب الاختلاف ده فين ؟ وفايدته ايه ؟
1 - المراه بتهتم بالتفاصيل اما الرجل فبيهتم بالصوره الكليه :
الراجل : اول لما يكون بره ويرجع تلاقى مراه او مامته او اخته او اى امراه تساله ها ؟ عملت ايه وكلمت مين ؟ وقالك ايه ؟ وكان مين معاه ؟ وانت ليه مقولتلهوش كذا ؟ واساله كتير لانها عاوزه توصل لحاجه فى دماغها ادق التفاصيل .
المراه : ترجع من بره يستنى الراجل لما تاخد نفسها وتغير هدومها وبعد فتره يسالها ها كله تمام ؟؟ وبيبقى مستنى بس اه كله تمام انما هى علشان بتقوم بالواجب وبتحكى كل التفاصيل
- صدق او لا تصدق : الراجل مبيسمعش من التفاصيل دى الا الى هو عاوزه والباقى مسمعهوش اصلا
- مثال حى : اى حد بيقرا الحلقه يكتبلنا فى الكومنتات ويوصفلنا اخر فرح كان معزم فيه
هتلاقوا الرجاله كاتبين فى وصف الفرح على الاكثر 3 تفصيلات
وهتلاقوا البنات كاتبين على الاقل 5 تفصيلات
(فرجونا المواهب فى الكومنتات )
ودى حاجه من عند ربنا ولا هو عيب فى البنات ولا هو ميزه فى الرجاله
- نصيحه :
*لو اى امراه سالت عن حاجه قول كل التفاصيل الى متخليهاش تسالك تانى واستحملها معلش
*ولو سالك اى راجل حاولى تقولى المفيد فى جمل معدوده واستحمليه معلش
2- فى تقييم الحب
الرجل يقيمه بالقيمه اما المراه تقيمه بالكم
بمعنى ان الراجل لو خرجتوا مره وعزمك على عزومه حلوه وفسحه كبيره ممكن يقعد عليها 3 شهور واحيانا سنه لانه بالنسباله هو تعب ف الخروجه لانه بيقيسها بالقيمه
اما المراه فبتحسبها بالكم يعنى خرجها كل اسبوع خروجه ولو خروجه صغيره لو هتنزل تتمشى شويه فبالنسبالها انت لففتها العالم
- نصيحه :
( قليل دائم خير من كثير منقطع )
خروجه صغيره او هديه صغيره كل اسبوع خير من فسحه كبيره او هديه كبيره كل 3 شهور
3- الرجل يحب الهدف والمراه تحب الطريقه :
بمعنى لما مثلا بيجوا يعملوا شوبينج مع بعض فالراجل اهم حاجه عنده انه يشترى ويروح ويحقق الهدف الى خرجه من بيته وهو شراء بعض الاشياء المتفق عليها
اما المراه لا ! هى اهم حاجه عندها التمتع بطريقه الحصول على هذه الاشياء المتفق عليها
فممكن تنزل تقعد تلف على المحلات كلها وف الاخر متشتريش
( لا تتعجب ايها الرجل انها هى المراه )
لان هى بتعتبر اصلا الشوبينج ده فسحه فى حد ذاتها
-نصيحه :
من قبل الخروج للتسوق اتفقوا على عدد ساعات معينه تعملوا فيها التسوق ده ولو مخلصناش خلال الوقت المحدد هنرجع البيت وهنكتفى بهذا القدر او سيبها تخرج تتسوق لوحدها
4- الرجل والمراه فى التعاملات :
المراه بتعرف تعمل اكثر من حاجه فى نفس الوقت غير الراجل
يعنى وهى بتطبخ بتتكلم فى الموبايل وفى نفس الوقت شيله ابنها ع دراعها التانى وبتتابع المسلسل وتقريبا بتحكيه لحد فى التليفون وفى نفس الوقت متابعه مع ابنها الى قاعد بيعمل الواجب وبتقولها ها خلصت حرف ال أ ولا لا خش بقا على حرف ال ب
اما الراجل مبعرفش يعمل اكتر من حاجه فى نفس الوقت وهو بيسوق مثلا مبيعرفش يتكلم فى الموبايل
ده علشان طريقه تفكير كل واحد
الراجل بيفكر بطريقه اسمها الصناديق
دماغه بتتكون من مجموعه من الصناديق صندوق البيت صندوق الشغل صندوق الاصدقاء صندوق مراته وفى فيهم صندوق فاضى احيانا بيحب يفتحه
تلاقيه مره واحده كده قاعد قدام التلفزيون وبيقلب ف القنوات ومش مركز فى اى حاجه ولا حتى التلفزيون
ف لا تقربوا الرجل لما يفتح صندوق الا شى
لا تتعجبى ايتها المراه انه الرجل )
اما المراه فطريقه تركيب دماغها عنكبوتيه كلها متوصله ببعضها
وهى ف الشغل بتفكر ف البيت وف الاطفال وجوزها وبتفكر ف كل حاجه فى نفس الوقت
- نصيحه:
حاولوا تسيبوا الراجل فى حاله لما يخش صندوق الا شئ بعدها بيبقى كويس متقلقوش عليه
5- الراجل بيفكر الاول وبعدين يقرر اما المراه بتقرر وبعدين تفكر :
فى معظم المواقف بتلاقى الراجل مش بياخد قرار بسرعه بيقعد يحسبها الاول ويجيبها يمين وشمال ويلففها فى دماغه وبعدين بياخد قرار ويكون مسؤل عنه مسؤليه تامه
اما المراه فاول ما بتاخد رأيها بتقرر على طول وبترجع بعد كده مع نفسها تفكر ولو طلع قرارها غلط احيانا بمتحاولش ترجع فيه وتحاول تغير من الظروف علشان يتماشى مع القرار بتاعها
(قولت احيانا يعنى مش كل البنات )
- نصيحه :
متتسرعيش يا حواء فى اتخاذ القرار ومتحاوليش تسربعى ادم فى اتخاذ القرار
6- الرجل واقعى اما المراه عاطفيه :
الراجل دايما بيفكر تفكير منطقى مبنى على المتاح وارض الواقع وبطريقه عقلانيه
اما المراه فتتخيل وتفترض وتبعد احيانا عن ارض الواقع فى التفكير
نصيحه : اقبلوا طرق تفكير بعض
** كل الى فوق دى فروق بينا اما عن الى ربنا ميز كل واحد بيه عن التانى :
•تتفوّق المرأة على الرّجل في المواد والتخصّصات العلميّة؛ اما الرجل يتفوّق عليها في تخصص الرّياضيات بشكلٍ خاص.
• تعتمد المرأة على تشغيل المخ بأكمله ويعتمد الرّجل على الجزء الأيسر من المخ عند التّفكير، ؛ لذلك يكون الرّجل أكثر تركيزاً من المرأة.
• تعدّ المرأة أسرع من الرّجل في تعلّم الكتابة والقراءة بينما يعدّ الرجل أقوى في العمليّات الحسابيّة وقياس الأبعاد.
• تتفوّق المرأة على الرّجل في تعلم اللغات.
• تتفوّق المرأة في وصف التّجارب والأشياء والتفاصيل؛ فهي تهتم بالتّفاصيل كثيراً، أمّا الرجل يهتمّ بالمجمل ولا يدقّق بأصغر الأمور.
• ذاكرة المرأة اقوى من ذاكره الرّجل .
• المرأة تسيطر على انفعلاتها بشكلٍ أقلّ من الرجل.
• تعدّ المرأة أقلّ استماعاً من الرّجل؛ فهي تتكلّم أكثر ممّا تسمع.
• أُثبت علميّاً أنّ للمرأة قدرة أكبر من الرجل على إنتاج الدّم.
• يعدّ النّظام الحيوي عند المرأة أكثر نشاطاً ممّا هو عند الرجل.
• يعدّ جلد الرّجل أسمك من جلد المرأة؛ ولذلك لا تظهر عليه التّجاعيد بكثرة كما تظهر على جلد المرأة.
• يعتمد الرّجل على المنطق في حلّ كلّ ما يدور من حوله، أمّا المرأة فتعتمد على إحساسها.
• يمتلك الرّجل مقدرةً أكبر على مواجهة الصعاب وقيادة الأمور مقارنةً بارتياد المرأة للمخاطر
• الرجل يفكر ثم يقرر، والمرأة تقرر ثم تفكر
• التملك بالنسبة للرجل نهاية، لكنه للمراة بداية
• اكثر ما تخشاه المراة من الرجل هو صمته، واكثر ما يخشاه الرجل من المرأة كلامها
• اكبر عيوب الرجل،انه لا يضع نفسه مكان المراة التي تحكم عليه
ملاحظه مهمه : مش لازم كل البنات وكل الشباب ينطبق عليهم كل الكلام ده
دايماً في استثناءات خاصه بالصفات والنواحي النفسيه والجسديه
الخلاصه : قولنالكم كل الكلام ده علشان نفهم بعض اكتر وكل واحد قبل ما يحكم على الطرف الاخر يفكر بطريقه تفكيره
وبكده نكون وصلنا لنهايه حلقه انهاردا من برنامج اتجوز صح مع شريك الحياه - أدهم و جيسى
أحمد وجيه
