شويه افكار وطرق بسيطة جدا هتفرق معاكى فى البيت
ومع دخول شهر رمضان كل سنه وانتوا طيببن
هتساعدك باذن الله فى التوفير للميزانيه
الفكره الاولى:
اعملى ميزانية للاسبوع واكتبى كل احتياجاتك فى ورقه
ولما تدخلى السوق وتشترى علمى على الحاجة اللى اشتريتيها
اشترى حاجاتك الاساسيه ( الضروريات )
هاتى كميه للاسبوع وادعى ربنا انه يرزقك البركه وشوفى بنفسك
الحاجة هتكفى ولا لا ,
الفكره التانيه:
لما تستلمى المرتب بتاع جوزك مثلا 1000جنيه
شيلى منهم100جنيه على جنب واتصرفى فى ال900ودبرى بيهم ميزانيه البيت
بشويه تدابير وشويه شطارة منك
يعنى ممكن نخلى 2 يوم اكلات مكلفه وباقى الاسبوع اكلات اقتصادية مع الالتزام بصحة الوجبة واضافة بعض الافكار لتغير روتين الاكل
احتياجاتك هتكون كالاتى:
لحوم (فراخ كاملة وبانيه ولحوم وسمك) وخزين البيت(الرز والمكرونة والفول والدقيق والسكر والزيت وخلااافه)
حاجة التلاجة ومنتجات الالبان ( اللبن والجبن بانواعها والزبادى والبيض وخلافه) ,حاجة البيت ( ادوات التنظيف والمناديل والبامبرز والمسحوق وخلافة) الخضار والفاكهة ,مصاريف البيت (الكهربا والمية والغاز والنت )
- بعدين فيه اجندة عشان يتكتب فيها المصروف اليومى ....تعملى جدول متقسم كالاتى:
اليوم
الوارد
المنصرف
البند
ملاحظات
- وعشان توفرى في افكار لازم تتبعى اى حاجة منها:
i) تجيبى حصالة وتلمى اى جينيهات معدن تبقى موجودة معاكى او مع جوزك ( ويفضل كل فترة تفتحيها وتطلعيها لله كصدقة... عشان ربنا يباركلكم فى فلوسكم)
ii) تعملى جمعية مع حد دى هتجبرك انك تقتصدى فى المصاريف
iii) تخدى مبلغ ما من المرتب وتبعديه عن ايديك كانه مجاش اصلا وتنسيه خالص ومتمديش ايديك عليه الا للضروره
iv) تشيلى كل يوم 5 جنيه مثلا( او حسب مقدرتك) وتحطيها فى حصالة كانك جبتى بيهم شيكولاتة او عصير او حاجة ساقعة ....مش هتحسى بيها ان شاء الله
واهم حاجة لازم تعمليها عشان ربنا يرزقكم من فضله و يباركلكم فى فلوسكم وصحتكم وولادكم تكثروا من الصدقات والاستغفار وصلة الارحام
